Blaogin'i Maeva74

    Tsy andriko intsony  ny nahatongavan' ny andro alahady handehananay mitsangatsangana teny Ankilibe, sondriana ery aho nikarakara ny sakafo maraina,  amin’izay mba miainga aloha.Ora vitsivitsy taty aoriana dia tafainga izahay ary izaho lasa nivily kely tany an-tranoko naka ireo kojakoja  ho entina. Rehefa avy eo dia lasa izahay nizotra nanaraka ny fiara be mpitatitr’olona mandram-pahatonga tany amin’ilay toerana, rehefa tonga ary izahay dia lasa aho nihazakazaka toy ny ankizy nanaraka ilay tora-pasika sady nikikika mafy aho niantsoantso an-dRado.  

- Rado! Henjeho aho raha tratranao  

            Dia nifanenjika izahay toy ireny zaza milalao ireny. Toy ny zaza kely aho nihazakazaka namakivaky ilay sisin-dranomasina, rehefa avy eo dia nirotsaka tany anaty rano aho. I Rado kosa variana nandinika ahy sy ny adalako, efa nanomboka nidanika ny hafanana dia niakatra aho namonjy azy teny am-body hazo, dia nitsotsotra  teo izahay. Dia hoy i Rado mantsy ahy: 

 - Tianao ve ry Rondro ny ho tonga ho vadiko. Gaga aho naheno ilay teniny, dia niato kely aho dia nasiako naveriny ilay teny nolazainy teo, dia mbola naverina indray hoe:

 - Tianao ve ny ho tonga ho vady an-defimandriko?? 

 -Tsia hoy aho namaly azy tsy taitra, Zendana izy nijery ahy no nanao hoe:  

- Tsy tianao izany aho ry Rondro?

-Tia anao tokoa aho ry Rado, nefa tsy mahamaika ahy ny ho tonga vadinao, ary tiako raha tsy hisy mihitsy izany.

 - Fa nahoana kosa? Hoy izy. Tsy azoko ny tianao hatongavana ka mba tiako ho fantarina. 

- Tsotra ry Rado an! hoy aho matotra ery, manimba ny fitia ny fanambadiana.  

             Tafatsangana izy ka nilaza tamiko tamin’ny feo hentitra manao hoe:

  - Mahagaga ahy ianao ; moa tsy fanirianareo tovovavy rehetra ve izany hampiakarina izany?

 - Ka ny tovovavy sasany izany fa tsy izaho kah! Hoy indray aho. 

- Rondro! tsy azoko mihitsy ianao ity hoy indray izy. 

- Rado an! Hoy aho namaly azy, tsy ny ho tonga ho vadinao na hitondra izay anaranao no tanjoko, na hilevona amin’izay fasana hilevenanao no hiriko, fa ny ho tonga kosa ho ilay ho olon-tianao irery ihany, tiako raha izaho irery no ao am-ponao, tiako raha izaho ihany no eritreretinao, ny faniriako dia ny ho tompon’ilay fonao sy fitiavanao tanteraka ary izaho irery no ho ao am-ponao ao.Ataoko maha- ampy ahy izany.

 - Izany indray no tsy hitako ry Rondro hoy izy nibanjina ahy. Izaho anefa maniry ny ho eo anilanao mandankariva, raha mifoha maraina aho dia ianao no tiako ho eo anilako eo, ianao no tiako hitsena ahy rehefa mirava avy miasa aho, ka tsy tanteraka izany raha tsy lasa vadiko ianao.  

- Ka izay indrindra no tsy tiako, ny ho lasa vadinao hoy indray aho.

 - Mbola hotohizana ny resaka hoy izy.  

           Dify ny mitatao vovonana, ka nitsangana izahay. Nandray  vakin-tavoahangy sendra hitany teny amin’ny fasika izy sady noraisiny ny tanako. Taitra aho  fa noheveriko ho tatahany amin’ity vakin-javatra ny tanako. 

- Andray ry Rado! Satria ve tsy nanaiky ny ho vadinao aho dia ho tatahanao iny zavatra maranitra iny e! 

- Nihomehy izy; Ianao ve adala ry Rondro an! Hoy indray izy. Ho raketiko eto amin’ity hazo ity ny litera iray mitovy amin’ireo fanombohan' ireo anarantsika dia ilay “litera R”  Dia nanao sary fo iray lehibe izy sady  noraisiny ny tanako ary nampanarahiny ny tanany nanoratra ilay litera teo ampovoan’ilay sary fo. 

         Rehefa vita ilay sary dia nifampijery izahay dia nifanantona indray ireo molotray mba hifanoroka. Tsy nahitana olona na dia iray aza teo amin’ilay toerana ka dia nararaotinay izany fotoana izany nifanorohanay, tsy nanaiky koa ireo safosafo ka nanaraka tsy satry ilay oroka malefaka, tsy nitsahatra izahay ka dia nilalao fitia mandram- piletik’ilay masoandro be.

          Nandroso ny ora, lasa tokoa ingahy be masoandro, ka tonga mba namangy koa ravolana. Efa nandroso ny alina ka tsy maintsy nody izahay avy eo.

         Teny an-dalana dia nifamihina tsy te hisaraka izahay. Nony tonga teo akaikin’ny tranoko anefa izahay dia indro i Laingo tazako nihazakazaka mafy, gaga aho nahita ity fihetsiny. 

- Rado! Tazanao ve i Laingo teo? Hoy aho 

 - Eny ry Rondro hoy izy saingy ny teninao no lasa aloha, mahagaga tokoa izany , fa maninona aty akaikin’ny tranonao aty izy??? amin' izao andro alina izao.

- Asa re tsy fantatro hoy aho tsy te hanohy ilay resaka.Tonga aho ity ka dia veloma vetivety ianao. 

- Veloma i Rondro! Satriko ho eo anilanao foana marina e! Rahampitso indray ary e! Hoy izy nalahelo sady narahiny oroka mamy.

Dia nisaraka izahay. Lasa izy namonjy fodiana . Nijanona nitazana azy aho mandra-pidifiny teo amin' ny kihon- dalana izay vao namonjy ny tranoko. Raha vao  tafiditra aho dia injay nisy feona fiara niriforifo be tsy nisy hoatr’izany , tsy taitra aho fa toa efa nahazatra ny sofiko ny hetraketraky ny tovolahy manodidina amin’ny filalaovana fiara, kanjo tampoka teo naheno feon' olona maromaro mikikika mafy manao hoe:

"Vonjeo eh! Vonjeo ! io misy tovolahy voadona" 

 Taitra mafy aho naheno ilay feo ka nihazakazaka nivoaka ny trano mba hamantatra izay miseho  ……..

Ho hitanao tsy ho ela ny tohiny.

Tena nangatsiaka tokoa ny alina, somary elaela ihany vao nahita sy nahazo torimaso izahay. Mandrapahatongany anefa dia hoy aho mantsy an-dRado:

- Rado ô! Raha sanatria tokoa moa ka ianao iny olona maty iny dia mba nanao ahoana re!

- Ka tsy izaho re iny Rondro ô! Mba tantarao ahy tokoa moa hoe:

-Nahoana no ninoanao fa izaho ilay razana ? Hoy i Rado sondriana te hahafantatra.

- Ka vao niditra ny trano aho dia naheno fiara niriforifo be, nefa tsy nahataitra ahy satria tsy vaovao akory izany ety aminay; fa ny nanaitra sy nahagaga ahy mafy dia ny horakoraky ny olona tany ivelany tany, dia mba taitra sy lasa mba nijery koa aho. Teny anaty vahoaka teny dia nahita famataranandro aho, ary tena mitovy tsy nisy valaka tamin’ ilay anao. Notapahan-dRado ny teniko ka hoy izy nanohy ahy:

- “Rondro” very tokoa anie ilay famataranandroko e! Niezaka ihany aho ny nikaroka an’ilay izy nefa be loatra ireo olona ka tsy hitako mihitsy, dia aiza ilay izy izao hoy indray izy?

 Nitsangana teo am-pandriana aho naka azy tao am-paosiko dia nampiseho azy ilay izy avy eo.

- Tena ilay famataranandroko tokoa izy izany! Hoy i Rado nandinika tsara ity zavatra.      

- Dia ity famataranandro ity fotsiny ve dia nitondra anao tamin’ ny finoana fa izaho ilay maty iny e! Hoy indray izy nandinika ahy.

- Tsy ianao tokoa mantsy ny teo amin’ ny toerako ka moramora aminao ny miteny, hoy aho tezitra, fa raha izaho iny dia tsy ho taitra akory angamba ianao, sa tsy izany? Hoy indray aho te hahazo toky.

- Ka tsy izaho re iny ry Rondro a! Raha ianao tokoa angamba iny dia nitomany be koa aho, hoy izy efa resin- tory sy nanoaka.

Dia nikimpy moramora ny masony, izaho kosa nitsiky kely sy nametraka moramora ny lohako teo an-tratrany , dia sondriana ihany koa aho nanaraka ilay torimaso efa madiva.

         Tonga ilay maraina. Maraina sy rivotra ary hery dia fiainana vaovao.i Rado mbola babon’ ny torimaso, izaho kosa efa liana dia liana ny haka fy ity andro vaovao.Nitsangana teo am-pandriana aho dia lasa namoha ny varavarankely tao an’ efitra ilany. Sady Nakimpiko ny masoko no natrakako ny lohako dia mbola nivavaka aho nanao hoe:

“Ray ô! Misaotra anao aho namerina ity olon-tiako sy nanome anay indray ity maraina vaovao. Ankininay eo ampelantananao Tompo ô! Ny fiainanay androany! Amen!”

Tany amin’ ilay toerana iray fipetrahan’ ireto Jiolahy kosa dia mbola mitohy ny resaka.

-Tena mino ve ianareo ireo fa ilay tovolahy voalazako io maty io? Hoy ilay Mademozely

-Tena milaza aminao izahay fa izy mihitsy io, hoy ny iray tamin’ireo jiolahy.

- Tsy mino izany aho raha tsy misy porofo mazava. Ahoana no hanomezako vola be anareo raha toa ka olon-kafa iny maty iny. Izao no izy:‘Ndao hiverina eny amin’ ilay toerana fa mila fanamarihana ny amin’ izany hoy ity Ramatoakely nitrerona ireto olona nokaramainy.

Dia lasa izy ireo nizotra nankeny amin’ ilay toerana misy ahy

- Eto ankihon-dalana eto isika no mitoetra; eto mahatazana izay rehetra mitranga ao amin’ io trano io, hoy ihany ity zazavavy be fialonana.

 Nandritra izay fotoana izay kosa dia taitra i Rado.

- Rondro ô! Aiza ianao teo? Hoy izy niantso ahy.

- Ahoana izay, hoy aho nitsiky sy namonjy nanoroka azy, taitra angaha ianao? Natory tsara ny malalako?

- Tena natory tokoa aho, fa hono ho aho Rondro, azoko nofy daholo ireo resantsika omaly alina, ilay mikasika ny hoe ho any Sakaraha hamonjy an’ireo Ray sy Reninao.tena vonona tokoa anefa ve ianao ny hiroso ny amin’ izany e? Sao lahy nohon’ ny dona nanjo anao alina no nahatonga anao ho nilaza izany fa tsy sitraponao akory, hoy i Rado mantsy ahy tena entitra.

- Rado ô! Tsy isalasalako intsony ny amin’ izay, tena vonona tanteraka aho, tiako ange ianao e! Toa zava-poana amiko izao tontolo izao raha tsy misy anao; asa izay ho fiainako raha handao ahy ianao, hoy aho taminy sady nanoroka azy indray.

- Ka hanainga izany isika androany, nefa tsy maintsy mankany an-trano aho hanomana izay ho entina. Ianao koa mandritra izany dia mikarakara izay ho vimbininao, sa tsy mety izay?? Hoy izy nitsiky sy nanoroka ny tendako.

- Hevitra mety tokoa! Nefa sao lahy ela be any ianao ka! Hoy aho niangoty ery, satria sao maninona any indray. Tsy aleo ve ny ahy aloha no vitaiko vetivety! Sady tsy dia misy entana firy ho vimbinina koa anie aho e! Fa efa betsaka any aminay. mandrapiomako dia azonao akatona ny varavarankely rehetra, izany moa Rado ô!Tia ahy moa ianao ô!

- Eny ary e! Atao anie ny sitraponao rahavako, sady nosintoniny ny voloko.

- Kay! Ianao an! Marary ange izany e!

- Rado, Rado, Rado foana! hoy indray izy mbola nanongo ny takolako.

- Ka tiako foana ny manonona ny anaranao anie! Sady nibitsibitsika teo ampoto-tsofiny aho nanao hoe:” Rado ô izaho ange ka tia anao e!”

Rehefa vita daholo ny kenonkenona rehetra dia nisotro ravimboafotsy izahay,avy eo dia nandalo tany amin-dRado naka ny entany ary nizotra teny amin’ ny “Taxi brousse” teny Sans Fils.

         Teny anelanelan’ izay fotoana izay anefa dia.....

- Aza variana eo ianareo ry zalahy a! Fa toa manidy varavarankely ny anareo, hoy ity jiolahy iray.

- Ary mety handeha hivoaka anie izy izany e! Sao mba handeha hamonjy ilay faty angamba! Hoy ity mademozely.                 

Tampoka teo anefa dia  nivoaka aho.

- Iny miala any iny sady mivimbina entana; ary ho aiza izy izany e? Hoy indray ity rain-dahiny amin’ ny fahavanonan-doza.                     

         Dia nanaraka ahy avy ao aoriana i Rado ka ......

- Ary tsy iRado ve io ! Tena izy mihitsy io, tsy manofy aho fa tena izy. Ialahisany vendram-belona daholo ! Tsy efa milaza aho fa tsy mahatoky maty raha tsy avy mandevina an! Aiza izao izay maty eo? Averina ny “mission”! Dondrona mianakavy daholo. 'Laozy midanaka eo indray fa tsy harahina aingana izay alehan’ ireny, haingana ho'aho! Mba mihetsiketsika ry Bema a!Hoy ity tovovavy efa romotry ny fahatezerana mafy sady nihaotraotra ny lohany.

- Fa hono ho'aho ry mademozely! hoy ity sefoben’ ireo jiolahy nitsatsaingoka, olon- tianao izao ve dia ho vonoinao e! Fa dia nahoana loatra?

- Tsy misy idiranao ny amin’ izany ry ilay vendrana ity an! Ny "mission" ampanaoviko tanterahana! Mazava an! Hanao sa tsy hanao fa eo no midanaka velona eo. Ary mba mihetsiketseha moa fa inona ary ity! Araho ry zareo any amin’ izay alehany, haingana e!

Nisosa moramora ilay posiposy nandehananay sy Rado. Tonga soamantsara izahay. teo ampidinana ilay posiposy aho no tsaroako nihodina ny lohako, toa fanina aho ka saika nitsingidina. Gaga i Rado nahatsikaritra izany ka nilaza hoe:

- Fa maninona tampoka teo izato ianao ry Rondro a!

- Vokatr’ilay ranomasoko omaly angamba izao hoy aho, mba gaga koa.

 Nandoa ny sarandalanay i Rado dia nitsofoka tao anaty fiara be izahay avy eo, fa tamin’ io fotoana io kosa ...

- Mandehana aloha ialahy ry Bema ataovy “plein”ny daba dia hanaraka an’ ireny isika.

- Mba rapidapida fa tsy midanaka eo e! Inona ity mapivandravandra? Hoy indray izy.

- Toa ohatry ny hiala ny “ville” ange ry zareo izany ry mademozely e! Hoy i Bema ilay sefon- jiolahy.

 - "Et alors"! Fantatro tsara izany e! Koa maninona anefa? Inona ny olana?

- Koa raha tsy diso aho toa “taxi broussen’ i Saharaha" izy izany koa, hoy i Bema

- Fa heverin’ ialahy vendrana ve leity izaho an! Hoy indray ity zazavavy.

Rehefa vonona daholo ny mpandeha dia roso ny fiara nizotra ny lalana mankany Sakaraha. Nangingina ny rehetra fa i Rado kosa tsy naharitra ka nilaza hoe:

“Mba hanao ahoana izao ny fandraisan’ireto Ray aman-dReninao izao fikasantsika izao ry Rondro?

- Tso-piainana ny Ray sy Reniko ry Rado a! Ka tsy misy tokony atahoranao ny amin’ izany fa mahaiza fotsiny ianao maka ny fon’ ny Dada fa izy ange mbola tsy mahafoy ahy e! Mbola zaza hono ka tsy tiany homena olona aloha, hoy aho nitsiky sy namihina ny tanany.

- Jereo amin’ izany ary koa! Zaza amin’ ny ahoana ary! Koa indry ary efa mahay zavatra be dia be koa, hoy i Rado sady nihomehy izy.

- Rado ity an! Mahay inona aho izao? Sady notsongoiko mafy be ny sandriny.

- Mahamenatr’olona re ry Rondro fa mba aoka izay a!

Hirahira malefadefaka no nandrotsirotsy anay mandrapahatonga tany sakaraha.

- Tiako ange izany hira izany ry Rado e! Hoy aho nanaraka azy. 

Raha misy tiana
Dia ianao
Raha ny hasambarako
Dia ianao, ianao ihany
Indrisy anefa fa tsy ho sahiko
Raha ny hanambara ny fitiavako

Rahoviana re ry tiana
Izao faniriako izao
No tsy ho nofy intsony
Fa ho anilanao
Mba lazao

Nataoko foana
Noho ianao
Izay hihaonantsika
Tamin’iny lalana iny
Indray andro izay aho
Dia niandry foana teo
Kanefa indrisy
Fa tsy nandalo ianao

Nanjary ho fijaliana
Ny nahitako anao
Raha tsy ho anao ry tiana
Ny fitiavako

Vao mba nitia any aho
Dia ianao
Ka ho hadalàko ve
Ny manjohy anao hatrany
Ataovy an-tsaina
Fa sarotra amiko
Raha ny hanambara ny fitiavako

Inianao ve ry tiana
Ny mbola tsy hamaly
Minia tsy mahalala
Ity foko efa tia
Tena tia

Nisosa moramora ilay fiara dia resin-tory aho ka tsy nahare izay rehetra niseho raha tsy efa nanaitra ahy i Rado nanao hoe:

 "Rondro mifohaza amin’ izay ianao fa tonga isika e!" jereo fa menamena be ny masonao.

- Hay tonga ve! Marary izany lohako izany ry Rado an! Hoy aho niketrona.

- Efa tonga isika izao ka aleo ianao manatona dokotera raha izany ary e! Sady nitsapa ny handriko izy.

- Tsy maninona, hoy aho niangetsana, fa mety aretin’andoha mandalo izany.

Nefa aho tsy te hanahirana olona, fa tena tsy azoazoko mihitsy ny vatako, no tena maloiloy be aho.

 Tampoka teo anefa injay nisy feo tsy dia vaovao tamiko niantso ahy mafy nanao hoe:

“Rondro! Rondro ô!

 - Ndryyyy! Laingo! Fa maninona aty Sakaraha koa indry? hoy aho taitra sy gaga.

Mbola hitohy

         Tampoka teo anefa injay nisy feo tsy dia vaovao tamiko niantso ahy mafy nanao hoe:“Rondro! Rondro ô! 

- Dryyyy! Laingo! Fa maninona aty Sakaraha koa indry? Hoy aho taitra sy gaga.

- Rondro! Ary toa gaga be aky indry nahita ahy teo! Hoy i Laingo nitsikitsiky sady nangala- pijery an-dRado ihany.

- Tena gaga tokoa aho aky nahita andry aty, fa misy havanareo angah aty?  Hoy aho sadaikatra nanontany azy.

- Eny aky ry Rondro an! Misy rahalahin’ i papanay manao afera aty dia mba nanaraka azy aho hoy izy nitsiky sady ny masony tsy mitsahatra ny mitopy any amin-dRado foana. 

         Ny tanan-dRado efa teo an-tsandriko no nanaitra ahy, satria variana loatra aho nandinik’ ity tovovavy manam- pitiavana ity olon-tiako, nefa ataoko ahoana moa ny hanafoana ny fitiavany an-dRado? Ataoko ahoana ny hilaza aminy hoe:” Atsaharo ny fidoboky ny fonao fa ahy izy” Tsy afaka hibaiko ny fihetsem-pon’ ny hafa aho fa ny ahy no arovako tsy ho resy. Saro-piaro aho saingy efa ahy i Rado ka tsy raharahako izay any am-pony any.

- Laingo! Manao ahoana ianao? F’angaha koa mipetraka aty Sakaraha ianareo? Hoy i Rado gaga nahita anay sy i Laingo niresaka, no mbola notohizany hoe: “Boribory ny tany an!”

- Manao ahoana i Ramose Rado! Hangata-bady angaha no tonga hatraty Sakaraha e! Hoy i Laingo nananihany an-dRado sady nijery nitongilana taty amiko.

- Voalazanao ry Laingo hoy i Rado sady nosontoniny aho hanatona azy dia norohany.Nangarika tsy nisy ohatr’izany i Laingo no niteny hoe:

- Aza hadino ary ny manasa anay e! Veloma ianareo roa! Fa avelao aho handeha.Sady lasa izy no nianjona ery!

         Izahay sy i Rado kosa efa reraky ny lalana ka namonjy nandeha tany an-trano, somary gagagaga ihany i Rado ka tsy naharitra ka nanontany ahy hoe:

- Ary toa nifampiresaka ange ianareo sy i Laingo ry Rondro? Sa izaho no tsy naharaka “film”?

- Mbola tsy noresahako anao tokoa moa ilay izy ô! Hoy aho nitsiky no nitodika nanara-maso ihany izay nalehan’ i Laingo, tsy andriko ery izay nahalasanany teo fa nahatsiravina ahy ity fiangolangolany tamin-dRado.

- Tamin’ ilay fotoana nandehananao nandevina an’ i mamanareo iny no nanomboka niresaka tamiko izy hoy aho.

- Hay ve e! Izaho mantsy gaga koa, dia atokisanao ve izy iny? Hoy i Rado mahina amin’ity fihetsik’ ity tovovavy jejo satria tsaroany ilay andro fahiny.

- Fa maninona kay? Tsy atokisanao angaha izy iny ry Rado hoy aho mba te hahafantatra izay ao am-pony.

- Tsy dia azoazoko ilay fihetsiny aloha hoy izy nefa rehefa vonona ny hinamana aminao izy, inona moa ny olana sa ahoana? Sady norohany indray aho.

- Neny! Ary avy aiza ianao no somebiseby ery? Hoy aho nahita an’ i Neny nandalo.

- Ikala Rondro! Dry toa maninona aty ny zanako? Fa misy inona? Hoy i Neny gaga sady variana izy nahita ilay valizy teny an-tanan-dRado no naminavina mafy izay ho atondianay.

- Manao ahoana tompoko ô! Hoy Rado somary menamenatra nahita an’ i Neny.

- Manao ahoana ianao tompoko! Hoy koa i Neny somary nitsiky arahin’ahiahy.

- F’ inona izato antondianareo no toa mavesabesatra ery hoy indray i Neny mahina.

- Izy ry Neny no Ramoseanay an! Rado no anarany hoy aho nilaza taminy sady nangovitra.

- Faly mahafantara anao Ramose ô! Mandrosoa an-trano ary, fa variana eto an-dalana eto isika hoy izy mantsy anay dia nanaraka an’ i Neny avy ato afara izahay.

- Reniny ô! Hoy i Dada niantsoantso an’ i Neny, saika ho eny an-tsaha aho hijery ireo mangahazo sao mba efa azo hangadiana ihany.

- Misy vahiny io Rainy ô! Avy any Toliara niaraka amin-janakao e! K’ avy aloha aty hiarahaba azy e! Hoy i Neny mantsy an’ i Dada.

- Koa maninona aty sahady i kalaratsy io? Misy vaovao angaha? Hoy i Dada mbola tsy nandroso tao amin’ ilay efitra misy anay.

- Mandrosoa aty an’ efitra re Rainy ô! Avelao any aloha ny mangahazo fa hiverenana rehefa avy eo e! Hoy indray i Neny efa may ny te hahafantatra izay antondianay sy i Rado.

- Eny ary fa aleo aloha aho hanakobana ny tanako vetivety e! 

           Dia minitra vitsy tato ahoriana dia nandroso tokoa i Dada mbola tsy nisaina izay ho vahiny, gaga sy zendana izy nahita an-dRado nipetraka teo anilako.

- Fa ahoana e! Fa misy inona? Inona ity adalana nataonao tany ry Ikalakely ity an! No arahin’ olona hatraty an-trano indriko! Hoy i Dada mantsy ahy sady nivandravandra be izy, satria tsy mbola fahitany ny toy izao. Zaza bodo no nahalalany ahy ka tsy nosaininy mihintsy hoe “mifankatia izahay sy i Rado”

- Aoka re Rainy ô! Aleo aloha ny olona hiresaka vao misafoaka toy izao izato ianao e! Hoy i Neny mantsy an’i Dada sady noraisiny ny tanako hanaraka azy.

- Andraso aloha! Ndao isika sy indry ho any andakozy hikarakara kafé ho an’ izy mianaka ry Rondro an! Hoy i Neny mantsy ahy sady tsapako fa liana mafy izy ny te hahalala zavatra ka nanadina ahy izay ho anton-dia.

- Lazao ahy izay marina ry Rondro an! Karazan’ irony olona mifankatia irony ny fahafantarako anareo sy…. iza ity anarany teo? Hoy i Neny entitra dia entitra.

- Rado re ny anarany ry Neny an! Fofombadiko izy hoy aho nanena ny feoko moramora.

- Inona ity lazaindry hoe? Fofombady! Sao dia lasa adala ity ikalakely ity! Ny fianarana tsy vita ka vady no ao an-tsaina. Tsy te haheno ny fahatezeran-dRaindry aho aloha e! Fa indry ve tsy mieritreritra e! Ny fianarana ahoana? Sao dia bevohoka ary ity indry ity? Hoy i Neny efa tena sepotry ny tebiteby.

- Tsia ry neny an! Neny koa toa miteniteny foana. Mifankatia izahay sy i Rado, vonona izy ny hampakatra ahy ho taolan-tehezany, ary aza matahotra ianao fa tsy mahasakana ny fianarako akory ny fanambadiana hoy aho mba te hahazo tosika kely avy any aminy.

- Izay mihitsy no mahasosotra amin’itony zaza diso “libre” itony. Asa izay hanaovan-dRaindry ahy marina moa hoy indray izy, efa im-piry moa aho izay no nanariny hoe: “iny zaza iny” aza mba avala hitoetra irery any, nefa dia natoky ny fahendren-dry aho, ankehitriny izao no vokany marina! Hanambady hono i Rondro kely. Lazao ahy ry Rondro an! Sao mitoe-jaza indry? Hoy indray i Neny efa mibitabitaky ny fanaintainana ny ho izay ho vavan’ i Dada.

          Tao an’ efitra kosa anefa dia toa nilamina ny resaka.

- Miala tsiny indrindra Ramose fa tsy nampoiziko ity fahatongavan-dRondro tampoka ohatr’ izao e!

- Tsy misy tsiny tompoko! Fa izaho no miala tsiny aminao fa nisososo toy ny vinanto tsy mahare fosa hoy i Rado efa torak’ ovitry ny tahotra.

- Fa inona izato anton-dia ry …. Iza moa no anaran’ ise? Hoy i Dada nanontany an-dRado.

- Antsoy hoe “Rado” aho tompoko tsara raha izay ihany.

- Faly mahafantatra anao izany ny tenako. Aiza ihany ary izy mianaka teo no tsy mbola tonga? 

- Aiza ihany izay kafé e! Inona no mahatamana anareo any e! Hoy i Dada nikikika niantso anay sy i Neny.

- Ho avy re Rainy ô! Hoy i Neny sady niteny tamiko hoe:

-  Aza manatena ny hoe:” Hiaro andry aho, fa adalana ny andry, ary ento ireo tasy sy ireo mofo mamy ireo dia mba haingakaingana.

         Efa nidoboka mafy ny ambavafoko niditr’ilay efitrano fandraisambahiny, tazako toa mangingina tsy misy resaka mbola vita, tony tsara any endrik’i Dada. Nangalam-pijery teny amin-dRado aho mba haminaviana izay niseho nadritr’izay fotoana tsy naha-teo anay izay, ary tsapako fa fantany ny tiako ambara ka nitsiky kely izy mba ampitony ny tebitebiko.

- Niantsena tany an’inona loatra no izay vao tonga e! Hoy i Dada narahin-kenatra nohon’ny fahataranay sy i Neny.

- Miala tsiny re Rangahy fa somary naharitra izahay ô! Hoy i Neny nanatsafa an’ i Dada sy efa vokin’ ny tahotra koa amin’ izay ho fihetsiny.

            Tamim-pahantoniana tanteraka no nilazan-dRado an’ izy mivady Ray aman-dReniko ny fikasanay. Somary nitrena kely i Dada teo ampandrenesana izany, nefa niha-tony izy avy eo nohon’ ny fahatsapany ny fitiavanay efa diso miredareda sy vonona hiroso amin’ ny fanambadiana. Ny andro koa efa mandroso dia mandroso, efa atomotra koa ny mitatao vovonana.

           Izahay ity dia vahiny tsy nampoizina ka izay masaka teo no niarahan-komana.

- Reniny ô! Vonoy ilay gisalahy maditra iny atao sakafo ra-alina sy hifalifaliana amin’ izany fikasan-dRado sy ikala Rondro kelintsika izany e! Hoy i dada mantsy an’ i Neny, falifaly toy ireny akoho kely notsimpazam- potsimbary ireny satria ity zanany toa mbola noeritreretiny ho zaza nefa hanambady sahady.

            Tsy nampoiziko ny fandraisany ny fikasanay. Mety tsinjony teny angamba ny fahamatoran-dRado sy ny maha tovolahy tsara taiza azy, fa tsy irony zatovo ankehitriny faly ny hitango sy ihinana ireny voatavo tsy mifandraka eny an-tsaha ireny fotsiny, dia avy eo tsy hita popoka rehefa avy manala azy.

- Mandehana retsy atoroy an-dRado ny efitranom-bahiny ry Rondro an! Dia omeo azy ny kojakoja rehetra mety hilainy hoy i Neny mantsy ahy.

         Fa noheverin’i Neny ho tovovavy mbola tsy nanota tokoa angamba aho na dia mahina ihany aza izy, sy nieritreritra ahy ho nitoe-jaza, ka tsy nampiarahiny efitrano izahay sy i Rado, sady izaho koa tsy nampiseho mivantana ny hiaraka efitra amin-dRado, zarako aza nanaiky i Dada.

- Eny re ry Neny! Hoy aho sady narahako fiatsarahimbelatsihy nanoro an-DRado ny efitranony.

         Rehefa tonga tao an'efitranom-bahiny izahay dia nakatonay moramora ny varavarana no nanararaotra ny nifanakalo oroka kely sy nifanafosafo indray, satria tsy nisy hirika mihitsy hifanatonana. 

       Tampoka teo anefa dia injay ny feon’ i Neny mikikika miantso ahy mafy ery, satria efa fantany izay mety hiseho sy hitranga rehefa irery izahay.

- Rondro ô! Vita ve retsy izy ao an! Hoy i Neny nitrerona.

- Eny tompoko! Efa vita ka! Hoy aho namaly sady mbola nangalatra nisambotra ny lelan-dRado ihany tamin’ ny vavako, avy eo dia nidina tany ambany rihina aho nanampy an’ i Neny.

         Na dia reraka sy mba te hitsotsotra ary izahay dia tsy nety, satria tsy hisy fotoana na iray minitra monja aza hifanatonana nohon’ ny fahasarota-piaron’ izy mivady, dia nandeha nivoaka nitsangatsangana nitsidika ny manodidina izahay no nifamihimpihina eran’ ny lalana. Ny mason’ ny mpitazana dia nivilambilana avokoa nandinika anay, teo ny nanampikasana ny hitati-bolana any amin’ izy mivady, nefa tsy nahoako fa vao maika nifanenjika eran’ ny lalana izahay sy i Rado. Tao ny tovovavy sasany babo tamin’ ilay fofombadiko,“fofombadiko” hoy aho satria efa niseho tamin’ ireo Ray sy Reniko izy no efa ahy koa ny fony, ka n’ iza n’ iza hitsiriritra azy dia tsy rarahako  fa efa ahy aloha izy.

            Rehefa reraky ny namindra sy nijery tanàna izahay dia namonjy nipetraka teny amoron-drano, dia nifamihina sy nihirahira nampiara-peo niaraka tamin’ ireo fody sy tsiriry nisaodisaody nitsikilo anay.

           Nandritr’izay fotoana izay kosa anefa dia ireo ilay jiolahy sy ilay tovovavy, niery tsy dia lavitra ary mahatazana tsara ny tranonay, iny eny ity tovovavy mijoro eo anjoron-davarangana sady mipololotra sigara tsy akijanona no variana mandinika ny paika manaraka hamonoana an-dRado. Tsy nampoiziny anefa fa iny i Bema nanantona azy ka taitra izy.

- Inona ity ataon’ ialahy ry dondron-dahy ity an! Manapaka lalandrà fotsiny hoy izy mantsy an’ ity filohan- jiolahy.

- Azafady re ry mademozely raha nanaitra anareo e! Fa dia nahoana loatra ary no dia hankalaina be toy izao i Rado e! Izay moa ilay anaran’ izy teo? Hoy i Bema.

- Tiako i Rado ry Bema an! Ka izay fitiavako azy izay indrindra no anton’ izao, tsy tiako ho anolonkafa izy rehefa tsy ho ahy, sarotra amiko ny hanaiky hoe lasan’ olona izy e! F’ inona koa anefa ny idiran’ ialahy lalina amin’ izany e! Hoy ity tovovavy mbola namerina nandrehitra sigara indray.

- Mba fanontaniana re! F’angaha dia tsy misy hafa ankoatrany, fa dia izy irery no eto an-tany e! Izaho izao ange mba sady taviny sy volony ihany koa e! Dia norohan’i Bema ilay tovovavy. 

          Tezitra mafy ny anao vavy, felaka mirivorivo sy mahery no tonga teny amin’ ny tarehan’ i Bema no narahin’ny teny mahery hoe:

- Aza haverina amiko intsony ireny “r’ilay alika lahy ity” azon’ ity izany! Ary lasa mandeha any fa manirikiry.

            Efa namonjy fodiana ilay masoandro ka dia lasa koa izahay mba nody koa hamonjy ny gisa lahin’ i Dada. Nisafononoka ny menaka ny tanako ary nanararaotra nifika taolana aho satria tsy dia fahita matetika raha tsy amin' ny andro fety ihany, tazako i Rado nandinika ahy mafy angamba mbola tsinjon' ny teny ny mbola maha-zaza ahy dia nahatsiaro menatra azy aho dia natsahatro ilay fikoriana.

          Nizotra soamantsara ny sakafo. Rehefa avy eo dia naka ilay gitarany i Dada, ka nihira ilay hira fikalon’izy mivady i Dada sy i Neny.  Samy resin’ ilay tori-maso sy vokin’ ilay gisa matavy ny rehetra ka nalaindaina ny handao ny toerany avy. Nisitaka namonjy ny efitranony i Dada sy Neny, dia samy namonjy ny anay avy koa izahay avy eo.

            Tonga ilay alina. Ny alina mangina sy tony toy izao no hanararaotan’ ny mpanao ratsy sy hampiderainy amin’ ny maizina ny fomba fanaony. Tsy nahita tory aho fa nivadibadika foana, matetika mandalo sy mitsidika ahy i Dada rehefa amin’ ny alina ka nalaiko ilay ondan-dava dia nasiako nandry teo amin’ ny toerako mba hisolo ahy sy mba hinoany fa ao ihany ity zanany vavy.

          Nijaikojaiko moramora aho namonjy an-dRado tany ambony rihana dia nitsofoka tsy nahandrenesam-peo teo akaikiny. Izaho efa nanafosafo azy sy nanoroka azy vao taitra izy ka niteny hoe:

- Inona ity ataondry ry Rondro an! Hoy i Rado gaga sady namihina sy nakafy ny safosafoko ihany koa.Injay nisy feo hafahafa tany ala-trano tany, feo mampatahotra, toa misy korotamby mifangaroharo, nangovitra mafy aho sady namihina mafy ilay malalako.

- Rado henonao ve izany e! Matahotra aho izany Hoy aho mbola namihina be an-dRado ihany.

- Ie! Hoy i Rado, henoko tokoa f’ inona izany? Mety saka angamba izany na alika miady sakafo e! Nefa toa olona mihitsy tena miha-manantona izy izany marina.

            Tsy mitsahatra mitombo ilay feo, vao maika miha-manatona ihany, torak’ ovitry ny tahotra aho ka nimenomenona tsy nisy ohatr’ izany, notampenan-dRado ny vavako dia hoy izy.

- Shhhh moramora aloha indry f’ aleo tsokiloviko eto ambaravarankely eto…….

Mbola hitohy!

           Rado mbola nijaikojaiko hamonjy hijery izay miseho tao ala-trano, izaho kosa mbola toran-kovitry ny tahotra, voadonako tsinahy ilay seza ka nianjera niakarapoka mafy tery amin’ny tany. Taitra izy ka nitodika tany amiko.

- Rondro! Inona indray ity nataondry? Hoy izy nibanjina ahy sady namonjy nijery ahy sao naratra.

- Tsy fanahiniako re iny ry Rado ô! Maizina loatra ka tsy hitako ilay seza teo koa, azafady re e!

- Aoka izay! Henoy fa lasa ry zalahy, henonindry izany mikoropaka any izany? Hoy indray izy mantsy ahy.Tany ivelany kosa anefa

- Ô ry zalahy a! Miverena fa tsy misy fika intsony, ajanona ny “mission” ary miverena haingana ialahisany fa sao tratra eo hoy i Bema tamin’ ireo namany.

              Dia lasa izy ireo namonjy niverina tany amin’ ilay toerana fitobiany.I mademozely mpaniraka kosa tsy maharitra fa sasatra foana ny mitsikilo sy mivezivezy eran’ ny trano sady tsy mitsahatra ny mipilolotra sigara.Efa misasaka ny alina, lasa ireo jiolahy, niverina tamin’ ny laony ny fahanginana. Na dia izany aza dia ela vao nahita tory aho fa i Rado kosa efa rendremana ka nanonjy fandriana.

- Rado ô! Hoy aho efa te hatory ve ianao? Tsy aleo ve aloha miresaka e!

- Fa ahoana kay e! Resak’ inona amin’ ity andro alina e! Hoy izy, matoria amin’izay moa ianao Rondro an! Efa haraina ange ny andro e!

- Ianao ve tsy tonga saina amin’ izao manjo antsika izao e! Hoy aho mahina amin’ ity zava-miseho.

- Aza alefa lavitra re ny saina ry Rondro an! Matoria amin’ izay ianao e! Hoy i Rado tsy te hihaino ahy intsony.

- Mba henoy moa aho e! Hoy aho niangoty, mikasa hisy hamono isika, jereo tsara! Tsy fifandrifinjavatra mihitsy izao.

- Inona ary ity? Hoy izy niarina nibanjina ahy no nilaza indray hoe:” tsy fifandrifianjavatra ahoana kay?”

- Iza ilay olona tazantsika nihazakazaka tany toliara teny akaikin’ ny tranoko indray alin’ ilay loza iny? Hoy aho mantsy azy sady natehiko teo amin’ny tehezako ny tanako roa.

- I Laingo hoy izy, aza miteniteny foana re ry Rondro an! Ekena fa sipa mitapy iny, nefa tsy mino aho fa hahavanona izany izy.

- Fa nahoana kosa? Hoy aho tezitra taminy. Ary iza ilay olona tazantsika tamin’ ny maraina avy nidina ilay “taxi brousse”? Hoy indray aho, moa ve tsy mbola izy ihany?

- Koa aiza koa anefa no ahalalanao fa olona saika hamono antsika ilay teo iny? Sao mba saka niady kosa.

- Eny e! Ianao ve moa tsy hiaro azy e! Ary iza koa ny mahalala raha efa niaraka tokoa ianareo e! Toa tsy hinoanao izay lazaiko nefa hita izao fa marina.

- Io indray ianao sy ny fahasarotampiaronao, efa im-piry aho milaza aminao fa ianao ihany no tiako, aoka aloha …. Hoy Rado nihankahana fa ……..

- Fa ahoana? Fa misy inona? Hono ho’aho Rado, hoy aho sady nanatona azy teny ampandriana.

- Mety ho marina tokoa izany lazainao izany ry Rondro? Satria indray alina iry, ilay isika tratrany teny amoron-dranomasina, tadidinao iny? Nanao vava be tamiko izy.

- Dia ahoana hoy aho nitsatsaingoka ny teniny, inona no nolazainy taminao kay?

- Hoy i Laingo mantsy ahy tamin’ iny “Ho hitanao tsara ny valin’izay ry Ramose fa tsy hataoko vita mora akory, tadidio fa na ho ela na ho aingana tsy maintsy miaraka isika”

- Hitanao amin’ izany! Sady lasa aho nihodinkodina eran’ ny trano sady nangovitra mafy ery.

- Ndao amin’ izay hatory re ry Rondro an! Efa amin’ ny iray maraina ange izao e! Aleo rahampitso tohizana ny resaka.

- Ho hitanao tsara fa hotadiaviko eran’ i Sakaraha iny rahampitso de ho teneniko. Hoy aho nisavoamboan' ny hatezerana.

- Aza manao hevitra taingina ohatr’ izany re e! Tsy manana porofo mazava isika ka tsy afaka hanendrikendrika olona amin’ izany. Ary raha sendra mifanena aminy ianao dia modio fanina ary hevero ho toy ny tsy misy izay niseho teo, ary aza ovaina ny fihetsikao sao mailo izy.

- Eny ary e! Ary andao amin’izay ary hatory fa efa amin’ ny roa maraina tokoa izao. Tafandria mandry Rado! Hoy aho sady nanoroka azy.

- Tafandria mandry indry! Hoy i Rado namaly ahy dia raiki-tory izahay.

               Nandritra izay fotoana izay kosa dia efa sasa-miandry ireo iraka nalefany i mademozely ka sasatra ihany ny mihodinkodina eran’ ny trano satria tsy tafatombina intsony izy maminaviana izay niseho.

              Tampoka teo tonga ireo Jiolahy.

- Nanao ahoana? Hoy izy vita ve ? Tantarao aloha ny rehetra ry zalahy an!

- Tsy raikitra ilay izy ry mademozely fa kobon’ ndry zareo izahay an! Dia tsy maintsy nitsoaka.

- Sendra izay vendrana foana ho’aho. Lasa ialahisany mandeha any fa manirikiry. Aleo mihitsy izaho no hanantanteraka ny “mission”. Hovitaiko amin’ ny fomba tsotra io e!

- Shh! Hoy i Bema sao heverinao kilalao ary ity izy no amin’ ny fomba tsotra angaha, sady lasa izy nandao ny efitranon-dramatoa kely.

              Mba lasa namonjy fandriana ihany koa ireo jiolahy. I mademozely kosa mbola nandrehitra sigara iray ka nipololotra an’ iny mangingina teo andavarangana no sady nandinika izay ho tetika mety. Nisosa tsy nahitana korontana intsony ny alina, nanomboka naneno ny akoho sy ny omby. Ora iray sisa dia hanomboka hifoha ireo tantsaha.

-Kokoriko ô! kokoriko ô! Hoy ny akoholahy.

- Koukoukoukou! Koukoukoukou! Hoy ny akohovavy.

            Taitra mafy aho ka tafatsangana teo ampandriana, i Rado kosa mbola tena nilomano tao anatin’ny torimasony. Norohako moramora izy dia nandao azy aho ka lasa nitsaitsaika namonjy ny efitranoko sao tratran’ i Dada eo ka hahita angano. Tonga soa amantsara tao anefitranoko aho dia niverina namonjy ilay torimaso tapaka.

- Rainy ô! Andeha hijery mofo gasy ery andrefana aho ho an’ ireo ankizy e! Dia mba jerijereo eo io rano nantaingiko eo am-pantana io, hoy i Neny reko miantsoantso an’ i Dada.

- Eny re Ramatoa ô! Hoy i Dada. Ary aza dia variana mitati-dresaka any fa izay ilaina tadiavina dia miverena. Satria efa diso fantatry Dada i Neny rehefa mahazo resaka izay, mandany ora vitsy mihitsy any an-tsena mitakoritsika amin’ ireo namany.

- Ny anao koa dia izany ihany! Lasa aho e! Dia aza hadinoina ilay ranon-kafé ary e!

           Tsy nahita torimaso intsony aho fa ny nivadibadika teo am-pandriana sisa no nataoko, leo aho ka lasa nidina nanampy an’ izy mivady.

- Taitra sahady angaha izato zanako vavy? Hoy i Dada mantsy ahy

- Manao ahoana i Dada? Sady nanoroka azy aho, ary efa lasa angaha i Neny teo?

- Salama tsara anaka hoy izy namaly ahy. Ie efa lasa izy e! Mandehana retsy tatazo ilay kafé ao dia velaro ny latabatra fa izaho hijery ilay zanak’ ikalamara sy hitery ny rononony vetivety (Ikalamara dia ny iray amin’ ireo omby vavin’ i Dada).Teo ampanaovana kafé aho no iny eny i Rado tonga.

- Manao ahoana ny malalako! Ary tsy reko ny nandehanandry teo an! Hoy izy sady norohany aho. Nanao ahoana tsy tratran’ i Dada ve indry? Niantso "Dada" an’ i Dada sahady izy.

- Vao henoko naneno ny omby sy ny vorona dia nitsaitsaika moramora aho, sady ianao koa mbola natory be dia tsy te hanaitra anao aho sady novonjen’ ilay molotro indray ny molony. Tampoka teo, iny eny i Neny tonga.

- Manao ahoana ianareo roa? Hoy i Neny, mandrosoa retsy ry Laingo an! Hoy indray izy.

- Laingo! Hoy aho gaga sy talanjona, f’angaha mifankahalala ianareo ry Neny?

- Ndry! Hoy i Neny mifankahalala angaha ianareo mirahavavy ry Rondro? Hoy i Neny gaga koa sady nandinika ahy sy i Rado mbola nifampitantana.

- Hay ve akia zanaky Ramatoa Ranivo indry e! Mahavariana ity fiainana ity an! Hoy i Laingo.

- Tena mahavariana tokoa hoy aho nandinika azy, sady tsy mitsahatra hatrany ity masony mitsipalotra mandinika an-dRado.

- Fa taiza no nahalalan’ i Neny an’ i Laingo e! Hoy aho liana dia liana tokoa.

- Zana-dralahan’ ingahy lehibe mpanangom- bokatra ange izy ry Rondro e! Hoy indray Neny mibaiko ahy amin’ ny masony handrava ny tananay sy I Rado mifampitantana.

- Hay ve ka dadatoandry i Ratrema e! Hoy aho nidanaka sy nitsiky tsy ravo. I Rado moa dia variana nandinika izay ho fihetsiko ka tsy nandray fitenenana mihitsy.

- Eny aky! Hoy i Laingo, izay indrindra, hilaozako kely ianareo ry Neny Ranivo a!

- Tsy hijanona hisotro ronona angaha indriko hoy i Neny mantsy azy.

- Aleo re ho zokin’ny any aoriana ry maman’ i Rondro ô! Handao kely anareo aho. Veloma i Ramose Rado hoy i Laingo sady norohany teo amin’ ny takolany i Rado no sady nangala-pijery tany amiko ihany izy.

- Veloma aky ry Rondro a! Hoy indray izy mody mba nanoroka ahy koa

- Veloma aky ry Laingo hoy aho mody nitsiky, nefa ny tao am-poko tsy faly taminy akory.

          Tonga i Dada nivimbina ilay ronono avy notereny dia avy eo niaraka nisakafo maraina izahay.

- Nahita tory tsara ve ny vahiny? Hoy i Dada mantsy an-dRado.

- Ie! Natory tsara ka, ary tena lava iny alina iny an! Hoy izy sady nangalam-pijery tany amiko ihany. 

           Nisosa tsara ny maraina niarahanay efa-mianaka nisakafo, dia avy eo nasain’i Dada hamonjy azy eny an-tsaha i Rado rehefa avy miomana, satria mbola tazany teny antongotr’i Rado ilay kapa volotany fitenany ao an-trano ary mbola teny ankodiny koa ilay akanjo ba efa resin’ ny taona fitondrany matory. Raha ny fahafantarako azy dia te hiresaka mangingina amin-dRado izy mikasika ilay fikasanay ny hivady. Izaho kosa nijanona tao an-trano fa tena tsy azokazoko ny tenako toa malaindaina aho toa maloloy ihany koa.

      Nezahako nafenina an’i Neny satria tsy tiako ny hieritreretany zavatra hafa eo. Tampoka teo anefa miha-mavesatra ny lohako, naloiloy be aho dia niakatra tany ambony rihana namonjy efitrano fidiovana. Avy hatrany dia nihoaka mafy aho. Ren’i Neny angamba ka nanontany izy

- Fa misy inona e! Indry ve izany ry Rondro ô!

- Ie ! Nanotsambava re aho e ! Hoy aho nanafina ity nanjo ahy.Nampiditra akanjo mafana aho dia nidina tany ambany, tsy azoazoko mihitsy ny aiko ka lasa aho namonjy dokotera nefa saika hijanona ao an-trano.

- Fa ho aiza indry izany! No mailamailaka ny hivoaka hoy i Neny mantsy ahy.

- Hivoaka kely haka rivotra aho ry Neny a ! Hoy aho nandainga taminy

- Ary aza maharitra ela any indry fa hikarakara sakafo isika avy eo

- Eny tompoko ! Hoy aho tsy haharitra ela aho ka! Ny nivoahako ny trano no ela fa vao dify kely ny vavavahady aho dia nihoaka indray, soa fa tsy nisy nahita.

        Tonga soa amantsara teo amin’ ilay toeram-pitsaboana aho ka lasa namonjy ilay dokotera efa nahazatra anay mianakavy. Tampoka teo anefa iny tokoa Radoko nahatazana ahy.

- Rondro kely ! Hoy izy arahabaina retsy fa afa-panadinana a ! Faly ery izao Raindry sy Ranivo amin’ izany fahafahandry izany e ! Henoko koa tamin-dRasendra (Rasendra dia vadin-dRadoko) aninkeho fa hanambady mpampianatra hono indry! 

- Mba vetivety koa ry Neny izany, hoy aho sady menamenatra azy.

- Inona izato aton-dia retsy e ! Hoy i Radoko. Tsy salamalama angaha?

- Ie tsy metimety mihitsy aho ity dokotera, efa ho andro vitsivitsy izay, noheveriko fa mandalo ihany kay vao maika nitohy koa.

- Soa fa tsy dia misy olona androany ka afaka mandray andry tsara aho anio hoy i Radoko sady notsapatsapainy teo aho no nalainy ny hafanako sy ny fitempon’ ny foko, avy eo dia nasainy naka rà aho.

- Mety haharitra angaha ny ho valiny dokotera ô! Hoy aho liana te hahalala izay ho manjo ahy.

- Miverena afaka ora iray raha tsy sahirana indry hoy izy

- Eny ary tompoko ô ! Hiodina kely eny an-tsena aho dia miverina eo ary ! Veloma vetivety ary ianao.

            Dia lasa aho nihodinkodina tao an-tsena nandritry ny ora iray, efa tsy andriko intsony ny haheno izay ho valiny ka nandeha aho niverina teny amin’ ny toby fitsaboana. Tampoka teo, iny eny tovovavy iray toa kaodikaody nanaraka ahy, tsy tazako izay endriny satria manao satroka mainty izy no manao fono tenda menamena, somary nijanona aho dia mba nijanona koa izy, nihazakazaka mafy aho namonjy an-dRadoko.

- Hay tonga indry hoy i Radoko mipetrapetraha ary e !