FITIA AN- TSOKOSOKO (FIZARANA FAHA EFATRA)

[ Tantara 2 ] 02 Novambra, 2009 14:11:: Voavaky in- (347)


Riana an! Hoy i Liva sady nibanjina ahy hatrany izy.

Liva! Ahoana izay? Hoy aho tamin'ny feo miangola sy mba nibanjina azy koa.

Tsy toy ny eto an-tany aho amin'izao ora andihizako miaraka aminao izao, toy ny manonofy aho. Tsy nosainiko akory izao fotoana izao, tsy nampoiziko ny nihaona taminao indray hoy izy sady norohany ny ratsako nipetraka teo an-tsorony.

Tsy nampoiziko ihany koa ny nihaona taminao ry Liva, folo taona izay, folo taona nisosa tsy nifankahitana akory na dia indray miserana aza. Izao ve no atao hoe: "kisendransendra sa lahatra e!" "Hoy aho nibanjina sy toa naniry sahady ny ho fihininy mafy"

Asa re ry Riana an! Folo taona no nanofisako anao, folo taona no naniriako ny mbola ho tojo anao. Ankehitriny nihaona isika, nihaona tamin'ny ora tsy nampoizina, dia ho lahatra tokoa ve! Hoy izy sady niezaka nanantona ny molotro ny molony, dia mba nanatona tsy nisalasala ny molony koa ny ahy dia nifanoroka izahay.

Toa nangoritsina tsy nisy ohatr'izany ny tenako. Naharitra teo amin'ny roa minitra ny nifanorohanay dia nahiliko kely izy satria nitamberina tao an-tsaiko tampoka fa hay moa izaho ka efa manan-tompo, efa nahavita sonia teo anatrehan'ny fanjakana sy ny fiangonana, efa vady andefomandrin'i Andry, I Andry ilay vady lazaina fa vadiko nefa tsy naniry ahy intsony. I Andry ilay hoe ho ahy sy hanaja ahy ho mandrakizay nefa tsy nankato ilay teny nifanaovana. Dia ho fahotako ve raha nanoroka an'I Liva aho. Tapitra koa ilay hira ka namonjy ny latabatra nisy anay izahay dia nandray tsindrin-tsakafo no nanohy niresaka.

Azafady ry Riana an! Tsy voabaikoko ny fihetsem-poko ka nanao ireny fihetsika ireny aho. Fantatro fa efa vadin'olona ianao nefa tsy nahasakana ity foko adalam-pitiavana anao izany.

Ankehitriny ry Liva dia toa tia anao koa aho saingy fantatro fa meloka eo anatrehan'ny tany aho, fa sambatra kosa any anatin'ny foko sy ny saiko, koa iza no henoiko?? Ilay foko mitempo fitia ho anao sa ilay hetraketraky ny tany sy ny lalànany?

Asa re ry Riana fa toa tia anao fotsiny aho, tia anao tsy nisalasala sy tsy nametram-panontaniana, fantatro fa maniry ny an'ny hafa aho. Koa iza no ho henoiko? Ilay fidoboky ny foko sa ny lalàna mifehy ny fiarahamonina? Sady tsy nitsahatra nibanjina ahy ihany izy.

Liva an! Tia anao aho, fantatro fa efa nitempo ho anao koa ilay foko fahiny saingy mbola kely sy bitika aho ka natahotra ny herin'ny fitia sy ny vokatra haterany. Koa inona no atao e! Modina tsy hita ve izao manjo antsika izao? Ho meloka ve isika raha mifankatia e! Hanenjika antsika ve ny fiangonana sy ny fanjakana?

Inona tokoa no atao ry Riana an! Hoy izy nandray ny tanako variana nilalao ilay sotro kely avy nihinanako "glace" satria mikorontana loatra ny saiko.

Aleo aloha aho hody ry Liva an! Aleo aho hody sao lahy hitondra antsika ho any amin'ny fakam-panahy izao alina izao e! Ny alina koa hono mitondra fisainana.

Dia nitsangana niala ilay latabatra izahay dia lasa nandoa ny vidi-tsakafonay izy fa izaho kosa namonjy naka trano fidiovana namboatra tena kely sy nijery ilay endriko saika kivy tanteraka.

Aleo ianao hateriko fa efa amin'ny roa ambinifolo alina izao, tsy azoko atao ny mandefa anao irery amin'izao misasak'alina izao hoy izy sady namboatra ilay voloko notsofin'ny rivotra.

Eny ary tsy maninona ka! Hoy aho sady efa matory izay ny manodidina anay ka tsy hisy ahatsikaritra antsika e!

Dia nisosa ilay fiara namakivaky ny arabean'Antananarivo renivohitra satria mbola nentin'I Liva nihodina ny fiarany. Najanonany kely teo Mahamasina ny fiarany alohan'ny hiakaranay eny "Fort voyron" (toerana misy anay).

Riana an! Tia anao aho hoy indray izy.

Liva tia anao koa aho hoy aho sady niantsoraka teny an-tsorony.

Nifamihina mafy izahay dia nifanantona indray ireo molotray nandritry ny minitra vitsivitsy. Dia avy eo niakatra namonjy ny lalana mody izahay. Nony tonga teo am-bavahady dia toy ireo zatovo mpifankatia tsy te hisaraka ireny nefa nohon'ny maha vadin'olona ahy dia nisaraka ihany izahay. Kopakopa-tanana no hany sisa nifanaovanay, nanara-maso an'i Liva sy ny fiarany sisa nataoko mandram-pidifiny ny kihon-dalana. Lasa i liva. Izaho irery sisa no tavela teo, lasa koa aho namonjy ny tokatranoko efa mangatsiaka. Namonjy trano fidiovana aho nanadio ireo loko sisa tavela teny amin'ny endriko sy nandro dia avy eo namonjy fandriana. Tsy nanana fotoana intsony aho nitsidihana ilay namako satria efa alina loatra ny andro. Tsy nitsahatra nisaina sy nandefa vetsovetso tany amin'i Liva aho. Tsy nandalo ny saiko intsony ny fanembonana an'I Andry.

Toamasina

Toerana iray atsinanan'I Toamasina dia I "Fenoarivo". Toerana iray alokalofan'ireo Antafa , sy voahaingon'ireo tora-pasika fotsy mangirana ary ny topatopan'ny ranomasina manga.

Andry an! Toa tsy ho vitako intsony ny hiandry anao ka! Efa ho telo taona izay no niarahantsika nefa toa fampanantenana poakaty no omenao ahy isan'andro isan'andro.

Ny fitiavantsika no zava-dehibe re ry Narindra an! Sarotra amiko ny hisaraka amin'I Riana .

Nahoana kosa e! Inona no maha-sarotra an'izany? Tsy aleonao ve milaza ny marina sy mandao azy, amin'izay samy vita ny aminareo toy izay hamitaka azy toy izao foana e! Herinandro ny asanao aty Toamasina nefa lazainao azy fa iray volana be izao nefa laninao miaraka amiko aty fotsiny. Dia inona no mbola mahasarotra an'izany e!

Fitiavako anao daholo ange izany ry Narindra e! Tia anao aho fa tsy tia an'I Riana intsony izay no zava-dehibe.

Tsy ampy ahy izany ry Andry an! Ny ho vadinao no tiako, ka tapaho ny hevitrao, sady izaho koa efa ho feno dimy ambiroapolo taona ka te hiteraka amin'izay e! Sao lahy ho lany tsiro aminao eto ny fahatanorako e!

Andray koa izany vavanao ry Narindra! Mba fantatrao moa fa nohon'ny fitiavako anao daholo izao lainga fahanako an'I Riana izao e!

Mbola tianao izany izy? Sa inona no dikan'izany teninao izany? Iza koa no mahalala fa mety misy olon-tiany koa any ho any.

Aza miteniteny foana ianao ry Narindra an! Tsy manao an'izany raha ny vadiko. Be ny zava-bitan'I Riana tamiko ka sarotra amiko ny handao azy e! Manenjika ahy ny eritreritro.

Dia izao famitahana azy izao ve aminao no fanafodiny e! Mino aho fa efa fantany ny amintsika.

Ianao anga no nilaza tany?

Koa na tsy nilaza aza aho, tsy paiso akory izy e! Vehivavy aho milaza aminao!

Ka atao ahoana I Benja kely e! I nedala no mampalahelo ahy e!

Izaho vonona ny ho reniny e! Sa mbola kely izy ka ny reniny no mahazo ny "garde"?

Moramora aminao marina izy izany e! Tsy anao tokoa ny lelo ka hainao ny manisina azy.

Eny e! tsy maninona tia aho ka miandry e!

Aoka izay moa ry malala an! Tiako anie ialahy e! Aza matahotra fa tsy maintsy tafaraka isika. Efa ho tapa-bolana izay mbola tsy niantso aho, afa-baraka mihitsy. Ampahatsahivo ahy rahampitso maraina ny hiantso an'I Riana an!

Eny e! Dia ahoana ny fandaharam-potoana rahampitso e! Ho aiza isika? Ndao hitsangatsangana e!

Eny ary e! Ndao ary aloha hatory fa efa haraina ny andro, ataontsika izay mety e! Tafandria mandry aloha ialahy dia etsy horohako izany malalako izany.

Ny anao koa izany foana, andao ary hatory e! "Bonne nuit" ny malalako.

Antananarivo

Nikiririoka ny antso an-tariby, taitra nitsamboatra teo am-pandriana aho, dia noraisiko haingana ilay antso avy eo.

Allo!

Allo! Izaho ihany ity ry Riana an!

Andry! Izao ve ianao vao miantso e! Tsy ao an-tsainao mihitsy mantsy fa manan-janaka kely anie ianao e! Dia rahoviana ianao no mody? Hoy aho mantsy an'i Andry tezitra taminy.

Na dia satriko aza izy hijanona any ihany, dia tia tena loatra aho satria mba malahelo sy mangoraka ilay zanako ny foko tsy mahita an-dRainy.

Ary aiza i lery e! Te hiresaka aminy aho izany

Raha nilaza tamiko mialoha ianao fa hiantso dia mba notazoniko teto amiko izy.

Fa nankaiza izy e! Hoy izy nitrerona ahy.

Lasa any amin-dry Mama izy e!

Mampamangy any aminy any izany fa hiantso aho rehefa iny malalaka iny e! Izay fa veloma e!

Tapaka ilay antso avy eo, folo minitra taty ahoriana, injay naneno indray ilay antso. Noheveriko I Andry indray dia tsy rototra aho, naneno nikikika fanin-telony vao noraisiko.

Allo!

Riana an! I Liva ihany ity e! Manao ahoana ianao? Nahita tory tsara ve!

Liva! Hay ianao! Faly be aho maheno ilay feonao indray, nahita tory tsara aho ka! Sady nanofy anao, ary ianao ve mba nanonofy ahy?

Nahita tsara ka! Tsy nety afaka tato an-tsofiko ilay feonao manga iny e! nanonofy antsika aho alina.

Tantarao hoe: "Taiza isika?"

Nihaona hono isika teny amin'ny habakabaka teny dia nanao akanjo fotsy hono ianao, nihazakazaka namonjy ahy efa niandry anao teny.

Tampoka teo niditra i Mama sy i Benja kely dia nakarapoko tampoka ilay antso.

Dada ve ilay niresaka tamin'I Neny teo e! hoy I Benja.

Tsy niteny aho tsy nivolana fa tampoka tamiko loatra ny fiavian'izy mianaka satria efa manana fanalahidin'ny tranonay i Mama ka tonga dia niditra. Tsinjon'i Mama teny amin'ny endriko ny famahinako ka hoy izy:

Iza ilay niresaka tamin-dry teo ry Riana??

Mbola hitohy

(16) Hametraka hevitra    (0) Verindrohy (trackback)   

FITIA AN- TSOKOSOKO (FIZARANA FAHA DIMY)

[ Tantara 2 ] 23 Novambra, 2009 11:22:: Voavaky in- (396)

Toamasina

Takariva somambisamby efa mody masoandro, mitopatopa ny ranomasim-be an'ny Fenoarivo antsinana, eny ho eny anefa, amorin'ilay tora-pasika mangirana sy midadasika. 

- Narindra an! Tiako enao nefa tsy sahiko ny hilaza amin'i Riana ny ato an-tsaiko. Izaho aloha dia mino fa ho voaraoka amin'ny asako, ary tsy maintsy ho tonga any amin'ny Riana ireo lehibe raha tsy miseho any amin'ny toby aho amin'ny herinandro ambony, satria "permission" herinandro ihany no azoko. Hoy i Andry efa matahotra izay hiseho.

- Tsy olana ny amin'izany e! Mahita fika tsara mihitsy aho ny momba izany ry Andry an! Nefa alohan'izany dia manaiky ve ianao fa hiaraka foana isika. Hiaraka toy ny mpivady rehetra e!

- Dia ataoko aiza ny vady aman-janako ary e!

- Mbola tianao ve aloha i Riana e!

- Renin-janako anie izy e!

- Fantatro izany e! Izaho koa anie ho renin-janakao tsy ho ela e! Sao ianao mihevitra fa hijanona amin'izao fotsiny aho mantsy.

- Sarotra be marina e! Tena sarotra Narindra an! Vaky ny saiko e! Inona no ataoko amin'izany?

- Izao ary ny fika hitako ry Andry fa mety an! Afaro ho tonga aty toamasina izy mianaka.

- Ianao sao dia mivadika ati-doha e! An'inona aty ry zareo?

- Mino aho fa tsy maintsy handefa telegrama ho an'I Riana ny lehibenareo. Tsy maintsy ho fantatry Riana ny marina rehetra. Koa izao no izy: "Miala tsy ho zandary intsony ianao"

- Ahoana hoe:" ry Narindra an!" Hiala tsy ho zandary??? Ary ianao sao dia misy fahavoazana, inona ny hivelomantsika sy hamelomako ny vady aman-janako e!

- Manomboka izao, dia izaho Narindra no ho vadinao. Na!! Ianao hiaraka amiko, Na!! Ho tantaraiko an'i Riana daholo ny momba antsika sy ny nanodikodinanao ny volanareo tany amin'ny banky.

- Narindra an! Efa tsy rariny intsony kosa izany ataonao izany e! Modianao tsy fantatra anga fa nomeko anao daholo ange ny ampahany amin'ireny vola be ireny e! Koa raha ho aty toamasina izy nefa dia ahoana? Inona ny atao?

- Fantatro fa mamapalahelo anao ny zanakao ka izao! Ho tonga aty izy mba hanao veloma anao farany. Hoy i Narindra tena mahatoky ny tenany. 

- Farany amin'ny ahoana ry Narindra an! Tsy azoko ny tianao ahantongavana! Hazavao ny teninao fa tena miezaka ny ho ao aho nefa tsy ao.

- Manomboka anio dia tsy ho "Lieutnant" Andry intsony no hiantsoana anao.

- Fa ahoana e! Ary iza??? Hoy I Andry tafantsangana.

- Izao aloha e! Antsoy izy mianaka dia aza manahy ianao ny amin'ny manaraka fa efa milamina ny resaka rehetra.

- Izany hoe efa nomaninao hatramin'ny ela izany izao resaka hifanaovantsika izao.

- Marina izany, tsy maintsy mandinika ny ho aviko koa aho fa tsy ho lalaovinao amin'izao fotsiny. Efa niresaka izahay sy I Papa fa ianao no hitantanana ny orinasa.

- Dia ahoana izany e! Dia ho afoiko izany ny zanako??

- Raha tianao aho dia tsy maintsy manaraka ny teniko ianao ry Andry an!

- Narindra an! Tsy rariny kosa izany e! Ataoko ahoana ny handao an'i Riana sy i Benja keliko e!

- Aza matahotra ianao ny momba izany e! Tsy ho very tsy ho zanakao anie izy e! Fa saingy tsy ho tezainao fotsiny. Atao izay hitiavany anao amin'ny ora vitsy, tambatambazanao tsara izy ary ataonao tsara zay hangalanao ny fony dia avy eo maty ianao.

- Maty ahoana! Hoy Andry mbola fanina amin'ny tetik'i Narindra. Tsy azoko mihitsy. Vao maika aho fanina tanteraka ry Narindra!!!

- Tantara an-tsehatra anie izany ry Andry e! Ianao koa sarotra mahazo zavatra marina.

- Mangataka fanazavana matotra aminao aho ry Narindra fa tena tsy azoko mihintsy marina e!

Antananarivo

Teo am-piresahana an'i Liva aho no indro niditra tampoka izy mianaka. Taitra tampoka aho noho izany ka notapahiko tsy nahy ilay antso. 

- Iza ilay niresaka tamin-dry teo retsy ry Riana?? Hoy i Mama 

- Niresaka tamin'i Andry aho teo ry Mama an! Hoy aho nandainga taminy.

- Mahagaga ahy mantsy ity fihetsik'indry koa.

- Naninona koa izao ny fihetsiko teo? Hoy aho niezaka nanafina tamin'ny Mama ny zava-misy. 

- Neny dia ahoana hoy i Dada? Dia rahoviana hono izy no ho tonga? Hoy I Benja kely nalahelo mafy an-dRainy.

- Tsy afaka hanatrika ny kilalaoan'ialahy i Dada, fa mety ho tonga hono izy tsy ho ela e! Hoy aho niezaka tsy nanakivy ity sombin'ny aiko. 

- Andray ry Neny! Dia tsy ho ahita ahy izany i Dada amin'ilay fetinay any am-pianarana. Hoy i Benja kely sady nifokofoko nanantona ahy izy. 

- Aoka izay moa e! Hoy i aho niezaka nanambitamby an'i Benja kely. 

- Noheveriko fa rahariva ange ianareo mianaka vao ho tonga ry Mama e! Fa misy inona tokoa?

- Tsy maintsy nanatitra an'I Benja aloha aho ry Riana fa misy fahoriana tsy maintsy ho vonjeko androany hariva e!

- Eny ary e! Dia misaotra betsaka ary dia mamangy ny fahoriana amin'izany namanao izany.

- Izay retsy fa aleo aloha aho handeha fa somary mamaika ihany e!

Dia lasa i Mama nandeha, fa izahay sy i Benja kely kosa nikasa ny hivoaka hisakafo tany ivelany. Tampoka teo anefa nikiririoka indray ilay antso mbola teny an-tanako. Tahaka ny hoe fantany fa ho lasa I Mama. 

- Allo!

- Allo! Riana an! Liva ihany ity e! Toa tapaka ilay antso teo dia niandry aho toa tsy nisy tohiny dia namerina indray e! Sao dia manelingelina anao aloha?

-  Azafady re ry Liva an! Tonga tampoka i Mama sy i Benjakely zanako dia notapahako tampoka.

- Afaka hiaraka hisakafo aminay mianaka ve ianareo mianaka? amin'izay koa mba mifankahalala tsara isika e!

- Sao manahirana izany ry Liva an! Hoy aho sadaikatra. 

- Tsy misy olana raha ny amiko aloha.

- Eny ary e! Aiza ny fotoana?

- Tsenaiko eo Mahamasina ianareo dia hisitaka kely ny renivohitra isika!

- Eny ary e! Izao dia izao izahay dia hiomana dia lasa e! Veloma vetivety i Liva. Ba betsaka.

Nisosa ilay minitra niomananay sy Benja kely dia lasa namonjy an'ny Mahamasina izahay. Indro i Liva miaraka amin'ilay tovovavy kely miendrim-bazaha. 

Mbola hitohy...
 

 

 

(13) Hametraka hevitra    (0) Verindrohy (trackback)