Faly miarahaba sy mandray anao eto amin'ity blaogy ity ny tenako. Faly aho manasa anao hanaraka tantara mitohy sy tononkalo fa izany no azoko aroso sy atolotra anao . Marihako etoana fa izay tantara ho soratako etoana dia tantara noforoniko avokoa, ary tsy misy tantarako na iray aza, ka miala tsiny raha sendra misy fitovian- javatra teo ämim'ny fiainan'ny tsirairay.
Dia mirary soa ho an'ny tsirairay izany i Maeva74
Mahazoa fy dia misaotra indrindra.
Maeva74
" Ary ankehitriny dia ireto telo ireto no mitoetra: ny finoana, ny fanantenana, ary ny fitiavana; fa ny FITIAVANA no lehibe indrindra"
" Maintenant donc ces trois choses demeurent : la foi, l'espérence, l'amour; mais la plus grande c est l'AMOUR "
" For now there are : faith, hope and love. But of these three the greatest is LOVE.
1CORINTHIANS 13.13
ASA IZANY Ny masonao no itiavako iny habakabaka iny Sa ny masonao no tiako dia ny habakaba-manga? Asa izany fa ny foko dia mihira ny hafaliany Anoloan'ny masonao sy ny lanitra mitranga
Ny tsikinao no itiavako fivelaram-boninkazo Sa ny molotrao no tiako dia ny voninkazo ihany? Asa izany fa ny foko tsy mitsahatra mivazo Anoloan'ny tsikinao sy ny voninkazo hatrany!
Tia ny voro-mihira aho fa nandre anao nikalo Sa ny vorona mikalo no hivetsoako anao mandalo nitondra hira tamin fiainako nangina hira taona maro!
Asa izany fa izao no hany zavatra tsaroako: Hatramin'ny niarahantsika dia dia mientana ny foko ka miventso ny fitiavana. ô ny antony , fantaro!
Tsy naharitra
ny dohikan'I Andry aho ka nandroso tao an-trano nanomana an'I Benja kely mba
hamonjy sasak'alina any ampiangonana. Tsinjoko efa velombelon'aina tokoa izy, ka
namonjy nizotra tany ampiangonana izahay avy eo. Rehefa tonga dia:
- Tsy dia maninona aho ry Riana an!Fa somary mihodina kely
fotsiny ny lohako, raha tsy mampaninona anao dia aleo aho hitsotsotra kely any
an-trano !
- F'izay ange ry Andry no
nilazako taminao hoe: " mbola reraka ianao ka tsy tokony ho nandeha taty isika
! Aleo ary samy hody daholo raha izany koa,hoy
aho tsy nisalasala.
- An! an! Riana an! Efa
nahazo ilay fanafana aho teo, fa mandehana mivavaka ianareo mianaka, dia aleo aho
hody fa tsy maninona. Riana!! hoy indray izy mbola haveriko aminao indray e! Tsy fantatra mantsy
izay mety hiseho eto amin'ity fiainana ity ka afatrafarako anao ihany ity
zavatra ity sady
nofihininy mafy ny tanako. Raha sanatria ka
maty aho dia aza sokafakafana mihitsy ny vata-patiko fa tsy ho tiako, izany
Riana an! Mahatoky anao aho.
- Andry an! Inona foana ary
izany zava-dratsy eritreretinao izany? Sao dia misy manjo anao irery any ry
Andry ka! Marina
e! Avelao izahay mianaka hody hiaraka aminao!
- Inona ny hanjo ahy eo e! Izany
Riana an! Aza adino izay hafatro izay. Mandehana ry Riana an! Mandehana ianareo
mianaka fa sao tara eo e! Sady ho betsaka ny olona ho tonga ka sao tsy ahazo toerana eo
ianareo. Hoy izy niangavy mafy ny
hijanonanay sady:
- Etsy ho fihiniko mafy ny
vady malalako no sady norohany teo amin'ny molotro aho. Benja!Avy leisy aty
amin'I dada an! dia hendre tsara ialahy! Dia ambeno tsara I Neny e! Hoy izy tena nalahelo anay tokoa. Veloma ianareo mianakahoy indray
izy sady tazako nijohy teny amin'ny endriny ny ranomasony.
- Mandehana! Hoy ilay feony toa feno fahoriana sady nandao anay izy avy eo
- Veloma vetivety ianao !! Hoy aho no mbola nanaramaso azy izay tsy nitodika
intson.Rehefa dify ilay kihon-dalana izy dia niditra tao am-piangonana izahay
mianaka. Maro dia maro tokoa ny olona ka zara raha nahazo sisin-tseza teo
an-tohatra izahay mianaka.
Teny an-dalana
kosa.
Naneno ny
anjombon'ilay fiara
- Andry!! Hoy ilay feo mikikika
- Narindra! Ary ela be anie
ianareo izany e! Izaho efa sempotry ny adi-tsaiko eto, ianao toa tsy miraika
akory.
- Ahoana ? Vita ny
fanaovam-belona an! Hoy I
Narindra
- 'Ndao handeha fa
mahasosotra ahy na ny mandinika anao ry Narindra. Tia anao loatra aho ka jamba
eo anatrehan'ny fitiavako anao.
- Inona ary ity e! Aza be
resaka eo ianao fa efa nanompy maso tany an-trano aho fa tsy misy olona eny
amin'ny manodidina, fa lasa namonjy lamesa avokoa angamba.
Nony tafidina
ny fiara I Andry dia nizotra moramora sy kaodikaody niditra ilay trano nisy azy
- Ramose!! hoy ilay rangaha
niantso
- Ahoana izay hoy izy
taitra mafy ery
- Saika hilaza aminao aho
fa hivoaka kely aloha, aleo tonga
dia ampidiriko eny amin'ny "garage" ny fiaranao e!
Tsy maninona! Hoy izy, dia
mandehana amin'izay sao tara eo ianao e!
Nony lasa ilay mpiandry
tanana dia niditra nanaraka azy I Narindra avy eo sady mailo ihany mandinika ny
manodidina sao misy mahita
- Minitra vitsy sisa no
hananantsika ry Andry ka mandehana mitsotra etsy ambonin'ny seza lava ery ianao
fa izaho hanidrona anao hoy I Narindra sady natsofiny ilay fonon-tanana efa
voahomany tany aminy mba tsy ahafantaran'olona ny fahatongavany.
- Avelao aloha Narindra fa
matahotra aho izany ka!
Nahifik'I
Narindra ny tanan'I Andry dia tonga
dia notsondroniny izy avy eo. Nitsitra avy hatrany afaka minitra vitsy izy, toy
ireny olona maty ireny tokoa. Rehefa avy eo dia nofafan'I Narindra daholo ny
manodidina rehetra ka tsy nahitana faritra na kely sy bitika aza ny marika
nolalovany, noharonony ny paosin'I Andry dia nalainy ilay findain'I Andry sy
ilay boky kely fitahirizany naoty.
Tsy niditry
ny saiko izay zava-niseho tao am-piangonana fa tany amin'I Andry foana ny
saiko, inona ny dikan'izao fiovana be taminy izao. Toa lasa nalemy fanahy teo
izy no lasa nalefaka tamiko.
- Benja an! Andao isika
mianaka hody fa tena tsy mandry ny saiko ka!
- Fa misy inona ry Neny? Hoy ity zanako mantsy ahy
- Andao isika zanako hody
fa misy zavatra ataon'I Neny any an-trano hoy
aho nandainga taminy
- Sady mampatahotra be ry
Neny ilay devoly mena sofina be ka ! sady izaho koa te hatory be! hoy i Benja namaly ahy
- Ndao ary e! Hoy aho dia lasa naka fiara karetsaka sendra
nandalo izahay ka nitodi-doha nandeha nody. Tazako misy jiro ao an'efitra , efa
matory ao angamba i Andry.
Tao an'efitra
kosa.
Mbola eo
ampamadibadihana ilay boky kely I Narindra no injay henony misy olona miditra
- Iza izany marina???
- Andry an! Efa tonga
anga ianao e!
- Riana marina! Inona no
ataoko ary matory angamba I Benja izany fa toa trotroiny.
- Neny an! Te hatory be aho
izany ka!
Mandehana ! Tonga dia miditra any amin'i dada izany zanako izany
fa izaho hamana rano aty andakozia vetivety.
- Eny ary e! Hoy I Benja
Efa babon'ny torimaso I Benja
ka tsy nahatsikaritra n'in'inona intsony
- Izay vao ho tratra marina
hoy I Narindra
Novohain'I
Benja ny efitra ka avy hatrany izy dia nitsofoka, tsy hitany I Narindra fa namonjy
an-drainy teny ambony seza izy. Toy ny tadio no nandaozan'I Narindra ilay
efitra. Dia nitsoriaka namonjy ilay fiara nafeniny tao alatrano izy mba hody haingana.
- Dada an! Dada an!
Mifohaza ho' aho I Dada an! Dada an! Fa maninona I dada ry Neny no toa tsy
mihetsika intsony an! Hoy I Benja mikikika mafy be! Neny an! Neny ho'aho e! Maninona i Dada an!
- Fa misy inona ry Benja an! Hoy aho nihazakazaka mafy namonjy azy.
Ny tanan'I
Benja manifikifika an-drainy no tazako
- Fa maninona i dada ry
Benja! Sady tonga aho dia nivoretaka
teo akaikin'ilay seza nisy an'I Andry, tsy nino izay nolazain'I Benja aho fa
nanifika sy niantsoantso an'I Andry koa no nataoko:
- Andry an! Mifohaza ianao
fa inona ary ity manao sangy ratsy ity e! Omeo aty iry finday iry ry Benja an! Hoy aho nangovitra.
- Moramora aloha ianao dia
mitenena miadana. Fa misy inona??
- Tsy fantatro izay manjo
an'I Andry fa tsy mihetsika intsony izy ato e!
Ho avy tsy ho ela aho hoy I dokotera, fotoana vitsy taty aoriana tokoa
dia tonga
izy.
- Fa misy inona?? Ary
maninona ianao ry Riana no mangovitra tahaka ity?
- Tsy fantaro izay manjo
an'I Andry fa hafahafa be izy ao tena tsy mihetsika mihitsy e!
Notsapain'I
dokotera I Andry dia hoy izy.
- Nandao antsika I Andry
vadinao ry Riana.
Kenda tsy
nahaloam-peo aho nandritry ny minitra vitsy no sady nangovitry ny tahotra, nitamberina tao an-tasiko ilay ora iray nahitako an'i Andry, ilay andron'ny fanambadianay.
- Fa misy inona ry Neny? Maninona I Dada? Hoy ilay feon-janako mitalaho nanaitra ahy variana
- Lasan'ny anjely any
an-danitra I dada hoy aho
mantsy an'I Benja kely sady lasa aho namihina an'ilay vady andefomandriko
- Andry! Andry! Dia izay
aho ity vao tena nilaozanao e! inona loatra ny nataoko no dia izaho sahady aho de ho vady mananon-tena miaraka amin'ny zaza, dia ho kamboty sahady ve i Benja kely e! Hoy aho nitomany
nigogogogo mafy
- Lasan'ny anjely ahoana ry
Neny? Lasa any an-danitra ve? Dia tsy nentiny ve isika sy Neny e! Ary maninona
koa I Neny no mitomany e! Hono ho aho ry Neny? Maninona I Neny e?
- Benja an! Lasa I Dada e! Nandao antsika izy, tsy hiverina intsony sniff hoy
aho nanafosafo ny lohan'ito zanako tsy mahalala n'ininona no mbola mifokofoko ihany
- Riana an! Ho karakaraina
ny razana dia antsoina ny toby sy ny fianakaviana rehetra dia avy eo ho entina
hiakatra any Iarivo.
- Dokotera!! Tena mbola
miala tsiny aminao aho fa raha tsy nisy anao tokoa angamba dia asa izay
nanjoanay mianaka kely taty e!
- Shhhh! Aza misahirana
ianao ry Riana fa izaho no hikarakara ny rehetra an!
- Aiza izao no ahitana
mpandrafitra vata eto Toamasina Dokotera? Hoy
aho nahatsiaro ilay hafatr'I Andry.
- Mahita aho fa hiantso azy
mihitsy aho izao fa raha toa ka mbola manana hery ianao dia ampirimo ny rehetra
dia aleo matory ianareo mianaka fa izaho hiantso ireo olona hanampy ahy amin'ny
fikarakarana ny razana. Hoy ity
dokotera tena tsy te hanome ahy andraikitra mihitsy.
Tsy laitra
nampanginina I Benja kely dia nomen'I dokotera Narindra fampatoriana dia avy eo
nisy tovolahy roalahy tonga
nitondra vata-paty roa samy samy hafa.
- Fa atao inona daholo ireo
vata ireo Dokotera hoy aho gaga, ary amin'izay tena voarafitra tsara tokoa
ireto izy. Ora iray monja dia voakarakaran'I Narindra ny antso sy ny
fampandrenesana ireo fianakaviana rehetra.
- Tena tsy haiko ny
hisaotra anao amin'ireo zava-bitanao taminay mianaka dokotera fa dia
Andriamanitra ao an-tampon'ny loha hiaro anao amin'ireo zava-kinendrinao e!
- Tsy misy fisaorana ry
Riana fa iza no tianao hasiana an'I Andry amin'ireo vata ireo e! Hoy izy
- Izay fantatrao fa mety re
ry Narindra an! Tsy fantatro sy tsy hitako izay hatao toa vaovao amiko izao manjo
ahy izao marina e! tsy aleo ve aho hampandro am-badiko e!
- Aza misahirana ianao fa
izy roalahy ireo efa voakarama, ny hikarakara faty no asany e! Hoy izy
Tsy nisy
nahitana olana ny raharaha rehetra iny alina iny nampandrenesina ny tobin'ny
zandary teo toamasina dia izy ireo no nampandre ny tany amin'ny tobon'ny
Ratsimandrava Antananarivo. Natao vonjy maika ny famoahana ny faty. Izany
rehetra izany dia I Narindra avokoa no tompon'andraikitra miaraka amin'ilay
"commandant" lehiben'ny zandary teto Toamasina sy Dokotera iray teo
amin'ny hopitaly. Izaho moa nohon'ny alaheloko be loatra sy ny fiandrasana an'I
Benja kely dia navelako izy nanantanteraka ny asa rehetra.
Nisosa tsy nahitana
sampona ny dia mandram-pahatonga tany aminay olona efa miakanjo maity avokoa no
tazako tao an-tranio I Mama no namonjy ahy sy namihina ahy mafy no nanao hoe:
- Miala tsiny aminareo rehetra aho! Hoy aho, fa hafatry ny maty dia ny tsy hamoahana ny vata misy azy.
- Ahoana koa izany! Hoy ny bitsibitsika nameno ny trano, jereo ange I ramatoa renin'I Andry fa mampalahelo ery! Hoy ny iray amin'ireo mpanatrika.
- Tsy manaiky an'izany aho ry Riana an! Zanako io ka tsy maintsy sokafana io vata io! Hoy indray rafotsy sady nanatona ilay vata miaraka amin'ny bara vy iray izy.
- Izaho no vadin'I Andry ry Neny Lucie an! Hoy aho ary manana andraikitra eo anatrehan'ny lalana aho momba azy. Tsy sokafana ny vata hoy ny hafatra napetrany ka tsy ho sokafako io n'inon'inona ataonao.
- I tena mihitsy no namono an-janako r'ikala mpamosavy ity an! Raha tsy nanambady an-tena izy izao tsy maty toy izao hoy indray ity rafozam-baviko.
Tsy nijanona nikikika I Neny Lucie ka nosamborin'I Narindra dia nomeny fanafody mampitony dia raiki-tory izy avy eo. Tsy nahenoina tabataba intsony ny trano ka nisosa ho azy ny fiandrasam-paty. Nony tonga ny ampitso dia nentina tany ampiangonana teny fiadanana ny razana dia avy eo nentina nizotra namonjy an' Ambohimalaza, ilay tanana nisy ny fasan-drazana. Teo am-pandevenana indro tazako I Liva. Nidoboka tsy nisy ohatr'izany ny ambava-foko.
Toamasina
Novohain ' ireo tovolahy ny vata iray dia
- Efa lasa any Antananarivo ny fatinao sy ny vady amanjanakao ramose an! Hoy ilay tovolahy iray nihomehy sy naneso an'I Andry.
- Aza miteniteny foana eo leisy lisany fa mandreraka an! Ary aiza I Narindra?
- Izao no hafatra e! Ity misy antso finday iray napetraky madamanao faharoa ho anao, dia hiantso anao hono izy rehefa milamina daholo ny any Antananarivo.
- Eny ary e! Dia inona no hafatra napetrany ankoatr'izay? Hoy I Andry
- Misy tranon'ny rain'i Narindra any "sainte Marie" ka any ianao no mipetraka aloha mandram-pahatongany, ary nanafatra mihitsy izy ny tsy hivoahanao ny trano hono sao dia hanahirana eo avy eo.
- Dia hanainga izao izany isika, dia vita hatreo izany ny lalantsika telo lahy avy eo hoy I Andry.
- Ie! Hoy indray ity tovolahy petsana.
- 'ndao ary r'izy roalahy fa tena natory marina aho teo e!
- Tena naharitra tokoa I ramose tao anaty vata tao an! Mafy izany Tia izany marina e! Tena mahavita aloha ianareo e!
- Mangina ialahy! Hoy ity namany no sady nikitika azy.
Rehefa tonga tany "Sainte marie" ry Andry dia nandao azy ireo tovolahy nanara-dia azy. Izy irery sisa no nihanohaino tao anatin'ity nosy kely ity, nivadibadika teny ny ora fa mbola tsy nisy antson'I Narindra ihany. Teo I Andry niketohan'ny nenina, nalahelo ireo vady aman-janany. Indrisy tsy afaka miverina intsony anefa.
Antananarivo
Toa tena I Liva izany tazako izany marina! Inona no alehany aty am-pasana ary an'inona aty izy izany? Tsy nahajery azy aho fa nahondriko ny lohako.
Rehefa vita ny fandevenana an'I Andry dia nandray ny tananay fianakaviana avokoa ny olona rehetra, ny feon'I Liva nibitsika teo ampototsofoko no nanaitra ahy; hoy izy:
- Aza misosoka alahelo intsony rahavako dia atrakao ny loha fa fiainana izao!
Dia lasa izy avy eo, fo nidobodoboka tsy nisy ohatr'izany no nameno ny tratrako, mahina tamin'ireo zava-nisy teo aminay sy I Liva aho. Tia azy aho, sarotra tamiko mihitsy ny nisaraka taminy nandritra izay fotoana izay nefa toa tsy sahy ny hanohy intsony aho, ho vitaiko hatreo ny aminay sy Liva.
- Riana an! Efa lasa daholo ny mpandevina f'aleo amin'izay aho hanainga ho any Toamasina hamonjy ny asako. Hoy I Narindra.
- Misaotra be dia be anao tokoa aho ry Dokotera fa raha tsy teo mantsy ianao asa angamba izay niseho teo e! tena saika nahita angano tamin'ilay fihetsik'I maman''itompokolahy teo aho . Hoy aho mantsy azy.
- Tena tsy nahamenatra azy mihintsy ny niapanga anao ho namono ny zanany.
- Soa fa nahazo fampatoriana avy any aminao izy teo f'angamba dia asa fotsiny izay niseho!
- Tena mbola betsaka ny zavatra henjehako ka aleo mihitsy aho hanainga. Izay fa dia mahereza fa fiainana daholo izany e! Dia mampamangy any amin'ny olona rehetra any.
Efa nanomboka lasa daholo ny olona I Mama sy I Benja kely efa lasa namonjy ireo fiara mpitatitra, fa izaho kosa mbola tafajanona farany mba hanao veloma an'I Andry vadiko.
- Lasa tokoa mantsy ianao ry Andry, fahoriana no nampitondrainao ahy. Tsy fantatro intsony na tokony alahelo sy hitomany aho amin'izao ora izao na hifaly sy hisaotra ny avo fa lasa ianao. Tsoriko aminao fa nitia olon-kafa an-tsokosoko ny foko nandritra izay fotoana nandehananao izay, tiako izy ary tsapako fa mihoatra lavitra nohon'ny fitiavako anao ny fitiavako azy. Na dia izany aza dia vadiko ianao ka sarotra amiko ny hanadino ireo lasa sy hanafoana vetivety ato an-tsaiko ny fahiny. Matokia ianao fa ho veloko ny zanako satria mbola nomen'Andriamanitra tanana roa aho ny hamelona azy. Izay fa dia veloma ianao ary mandria am-piadanana.
Dia lasa aho avy eo namonjy ny fianakaviana.
Rehefa nizotra namonjy an'I Mama sy I Benja kely aho no iny eny tazako I Liva toa hamonjy ahy nefa tafa-janona avy eo.
- Narindra!
- Liva! Fa maninona aty Ambohimalaza ianao?
MBOLA HITOHY!
Ialako tsiny mialoha raha toa ka tsy afaka ny handefa ny tohin'ny tantara aho ny alatsinainy manaraka nohon'ny antony izay tsy azoko hanoharana. Kanefa na dia izany aza dia efa misy zavatra azo haroso anareo ho solon'izany, ataovy hoe tsy tonga ilay alatsinainy.
